રાઉઝ એવન્યુ કોર્ટની મેજિસ્ટ્રેટ કોર્ટે જુલાઈ 2024માં સંસદ ઘેરાબંધીના વિરોધ પ્રદર્શન સંબંધિત કેસમાં ઓલ ઈન્ડિયા મહિલા કોંગ્રેસના પ્રમુખ અને ભૂતપૂર્વ ધારાસભ્ય અલકા લાંબાને દોષિત ઠેરવ્યા છે. કોર્ટે તેમને સરકારી કર્મચારીઓ પર હુમલો કરવા, સરકારી કામમાં અવરોધ ઊભો કરવા, મનાઈ હુકમનો અનાદર કરવા અને જાહેર રસ્તો રોકવા બદલ દોષિત ઠેરવ્યા છે. સજા સંભળાવવા માટે કેસ પાંચમી જૂન સુધી મુલતવી રાખવામાં આવ્યો છે.

એડિશનલ ચીફ જ્યુડિશિયલ મેજિસ્ટ્રેટ અશ્વિની પનવારે તેમના ચુકાદામાં જણાવ્યું હતું કે 29 જુલાઈ, 2024ના રોજ જંતર-મંતર પર મહિલા અનામતની માંગણીના વિરોધ દરમિયાન, લાંબાએ 200-300 વિરોધીઓના જૂથનું નેતૃત્વ કર્યું હતું અને સંસદ તરફ આગળ વધવાનો પ્રયાસ કર્યો હતો. કોર્ટે સ્વીકાર્યું કે આ ફક્ત પ્રતીકાત્મક વિરોધ નહોતો, પરંતુ પ્રતિબંધિત વિસ્તારમાં પ્રવેશવાનો સંગઠિત પ્રયાસ હતો.

આ ચુકાદો મુખ્યત્વે વીડિયો ફૂટેજ પર આધારિત હતો. કોર્ટે સ્પષ્ટ કર્યું કે જ્યાં વીડિયો પુરાવા ઉપલબ્ધ છે, ત્યાં મૌખિક જુબાની તેનો વિરોધ કરવા માટે સ્વીકારી શકાતી નથી. રેકોર્ડિંગમાં લાંબાને બેરિકેડ પાર કરનારાઓમાં સૌથી આગળ દર્શાવવામાં આવ્યા હતા અને અન્ય પ્રદર્શનકારીઓને આગળ વધવા માટે સંકેત આપી રહ્યા હતા. પ્રદર્શનકારીઓએ લાઉડસ્પીકર પર વરિષ્ઠ પોલીસ અધિકારીઓ દ્વારા આપવામાં આવેલી ચેતવણીઓની અવગણના કરી હતી. ચુકાદા મુજબ, લાંબાએ જાણી જોઈને બીએનએસએસની કલમ 163 હેઠળ લાદવામાં આવેલા પ્રતિબંધનું ઉલ્લંઘન કર્યું હતું.

અલકા લાંબાને જે ગુનાઓ માટે દોષિત ઠેરવવામાં આવ્યા છે તેમાં અલગ અલગ સજાઓની જોગવાઈ છે. કલમ ૧૩૨ હેઠળ જાહેર સેવકને તેની ફરજ બજાવવામાં રોકવા માટે હુમલો અથવા બળનો ઉપયોગ જેમાં વધુમાં વધુ બે વર્ષની કેદ, દંડ, અથવા બંને. કલમ ૨૨૧ હેઠળ જાહેર સેવકને તેના જાહેર કાર્યો કરવામાં અવરોધ કરવો જેમાં વધુમાં વધુ ત્રણ મહિનાની કેદ, અથવા ૨,૫૦૦ રૂપિયા સુધીનો દંડ, અથવા બંને. કલમ ૨૨૩(એ) હેઠળ જાહેર સેવક દ્વારા જારી કરાયેલા આદેશનું પાલન ન કરવું, જેમાં જો આદેશનું પાલન કરવામાં નિષ્ફળતા માનવ જીવન, આરોગ્ય અથવા સલામતીને જોખમમાં મૂકે છે તો છ મહિના સુધીની કેદ, ૨,૦૦૦ રૂપિયા સુધીનો દંડ, અથવા બંને. કલમ ૨૮૫ હેઠળ જાહેર રીતે ભય અથવા અવરોધ ઊભો કરવો, જેમાં ફક્ત ૫,૦૦૦ રૂપિયા સુધીના દંડની સજાની જોગવાઈ છે.