દક્ષિણ અમેરિકાના દેશ કોલંબિયામાં સોમવારે વાયુસેનાનું એક વિમાન ઉડાન ભરતી વખતે દુર્ઘટનાગ્રસ્ત થયું હતું. આ વિમાનમાં 100થી વધુ જવાનો સવાર હોવાથી મોટી જાનહાનિની આશંકા સેવાઈ રહી છે. આ અકસ્માત દક્ષિણી એમેઝોન વિસ્તારમાં પેરુની સરહદ પાસે આવેલા 'પ્યુર્ટો લેગુઇઝામો' વિસ્તારમાં સર્જાયો હતો.

હરક્યુલસ C-130 વિમાન સાથે અકસ્માત
કોલંબિયાના સંરક્ષણ મંત્રી પેડ્રો સાંચેઝના જણાવ્યા અનુસાર, વાયુસેનાનું શક્તિશાળી 'હરક્યુલસ C-130' (Hercules C-130) સૈન્ય વિમાન રનવે પરથી ઉડાન ભરી રહ્યું હતું ત્યારે જ ટેક-ઓફ દરમિયાન તે ક્રેશ થયું હતું. આ વિમાન સૈનિકોની હેરફેર માટે વપરાતું મહત્વનું પરિવહન વિમાન છે.

હતાહત અંગેની સ્થિતિ અસ્પષ્ટ
સંરક્ષણ મંત્રીએ વધુમાં જણાવ્યું હતું કે, વિમાનમાં સવાર મુસાફરો અને ક્રૂ મેમ્બર્સ પૈકી કેટલા લોકોના મોત થયા છે કે કેટલા ઘાયલ થયા છે, તે અંગે હજુ સુધી કોઈ સત્તાવાર પુષ્ટિ કરવામાં આવી નથી. અકસ્માત કયા કારણોસર સર્જાયો તે જાણવા માટે ઉચ્ચ સ્તરીય તપાસના આદેશો આપી દેવામાં આવ્યા છે. પ્રાથમિક દૃષ્ટિએ ટેકનિકલ ખામી કે ખરાબ હવામાન કારણભૂત હોઈ શકે છે.

યુદ્ધના ધોરણે બચાવ કામગીરી
ઘટનાની જાણ થતા જ સેના અને સ્થાનિક તંત્રના રાહત અને બચાવ દળોને તાત્કાલિક ઘટનાસ્થળે રવાના કરવામાં આવ્યા છે. દુર્ગમ એમેઝોન વિસ્તાર હોવા છતાં, હેલિકોપ્ટર અને વિશેષ ટીમો દ્વારા સ્થિતિનો જાયજો લેવામાં આવી રહ્યો છે. ઈજાગ્રસ્તોને નજીકની હોસ્પિટલમાં પહોંચાડવા માટે એર-એમ્બ્યુલન્સની પણ મદદ લેવામાં આવી રહી છે.

આ આખી ઘટના બાદ કોલંબિયાની સરકાર અને સેના અત્યંત સતર્ક છે અને સૈનિકોના પરિવારજનોને માહિતી પૂરી પાડવા માટે હેલ્પલાઇન નંબર જાહેર કરવાની પ્રક્રિયા હાથ ધરી છે.