સાડા ત્રણ વર્ષના લાંબા સમયના વિરહ બાદ ગગનમાંથી પોરબંદરની ધરતી ઉપર આમ મુસાફરો માટેનું સ્પાઇસ જેટનું પ્રથમ વિમાન ઉતરતા મુસાફરોને આવકારવા માટે નેતાઓ દોડી ગયા હતા.
પોરબંદરના અદ્યતન અને કરોડોના ખર્ચે બનેલા એરપોર્ટ ઉપર વર્ષોથી નિયમિત ફલાઇટ ઉડતી હતી પરંતુ છેલ્લા સાડા ત્રણ વર્ષથી વિમાની સેવા બંધ થઇ ગઇ હતી. જેને પુન: શ‚ કરવા પૂર્વ સાંસદ રમેશ ધડુકથી માંડીને હાલના સાંસદ ડો. મનસુખ માંડવીયા અને રાજ્યસભાના સાંસદ રામભાઇ મોકરીયાથી માંડીને પોરબંદરના ધારાસભ્ય અર્જુન મોઢવાડીયાએ વારંવાર કેન્દ્ર સરકારને રજૂઆતો કરી હતી.અંતે પોરબંદરવાસીઓની આતુરતાનો અંત આવ્યો હોય તેમ આ વિમાની સેવા પુન: શ‚ થઇ છે ત્યારે મુંબઇ-પોરબંદર-મુંબઇ સ્પાઇસ જેટની પ્રથમ ફલાઇટ એરપોર્ટ ખાતે આવી પહોંચતા ધારાસભ્ય અર્જુન મોઢવાડીયા અને પૂર્વકેબિનેટમંત્રી બાબુભાઇ બોખીરીયા સહિતના નેતાઓ દોડી ગયા હતા.  મુસાફરોનું એરપોર્ટ તંત્ર દ્વારા ભારતીય સંસ્કૃતિ મુજબ લલાટે તિલક કરીને તથા પુષ્પગુચ્છ તથા ગિફટ આપીને સ્વાગત કરવામાં આવ્યુ હતુ. પ્રથમ ફલાઇટમાં મુંબઇથી ૩૭ જેટલા મુસાફરો પોરબંદર આવ્યા હતા અને પોરબંદરથી રવાના થયેલી ફલાઇટમાં ૧૭ મુસાફરોએ હવાઇ સફર કરી હતી. એપ્રિલથી અઠવાડિયામાં બે વખત મંગળવારે તથા ગુરુવારે આ ફલાઇટ ઉડાન ભરશે તેમ જાણવા મળ્યુ છે.