ખેડાના શ્રદ્ધાળુ મહિલાનું અપમૃત્યુ

ખેડા જિલ્લાના કઠલાલ તાલુકાના ઘોઘાવાડા ગામના રહીશ ચંદ્રિકાબેન ભગુભાઈ ઈશ્વરભાઈ પટેલ નામના 65 વર્ષના મહિલા તાજેતરમાં દ્વારકા તેમજ બેટ દ્વારકા વિસ્તારમાં દર્શનાર્થે આવ્યા હતા. તે દરમિયાન ગત તારીખ 8 માર્ચના રોજ તેઓ બેટ દ્વારકા વિસ્તારમાં આવેલા હનુમાન દાંડી મંદિરે દર્શન કરવા માટે ગયા હતા. ત્યારે માર્ગમાં જી.જે. 37 યુ. 5644 નંબરના એક રીક્ષાના ચાલકે પોતાનો રીક્ષા પુરઝડપે અને બેફીકરાઈપૂર્વક ચલાવતા ગોલાઈમાં તેણે અચાનક કાવો (વળાંક) લેતા ચંદ્રિકાબેન રીક્ષામાંથી ફંગોળાઈ ગયા હતા અને તેમને માથાના ભાગે તેમજ શરીરના જુદા જુદા ભાગોમાં ગંભીર ઈજાઓ સાથે હોસ્પિટલમાં ખસેડવામાં આવ્યા હતા. જ્યાં સારવાર દરમિયાન તેમનું મૃત્યુ નીપજ્યું હતું.

આ બનાવ અંગે મૃતકના પુત્ર જયેશભાઈ ભગુભાઈ પટેલ (ઉ.વ. 44, રહે. ઘોઘાવાડા, તા. કઠલાલ)ની ફરિયાદ પરથી બેટ દ્વારકા પોલીસે ઓટો રીક્ષાના ચાલક સામે જુદી જુદી કલમ હેઠળ ગુનો નોંધી, આગળની કાર્યવાહી કરી હતી.

ખંભાળિયામાં પરપ્રાંતિય શ્રમિકને હાર્ટ એટેક

મહારાષ્ટ્ર રાજ્યના નંદુરબાર જિલ્લાના તળોદા ગામના મૂળ રહીશ અને હાલ ખંભાળિયા તાલુકાના મોવાણ ગામે રહેતા તથા ખેત મજૂરી કરતા પ્રવીણભાઈ નવાભાઈ પાડવી નામના 42 વર્ષના યુવાનને શુક્રવારે સાંજના સમયે હૃદયરોગનો ઘાતક હુમલો આવી જતા તેમનું મૃત્યુ નીપજ્યું હોવા અંગેની જાણ અજયભાઈ પાડવીએ ખંભાળિયા પોલીસને કરી છે.