શહેરના માધાપર ચોકડી મોરબી રોડ વચ્ચે બે ટુવ્હીલર વચ્ચે અકસ્માત સર્જાતા મોરબી રોડ પર રહેતા યુવાનનું મોત નિપજયું હતું. જયારે અન્ય બે યુવાનને ઈજા થવાથી સારવાર માટે સિવિલમાં ખસેડવામાં આવ્યા હતા. બનાવના પગલે ગાંધીગ્રામ પોલીસ દોડી ગઈ હતી.
મોરબી રોડ પર મારૂતિ સોસાયટીમાં રહેતા નિકુંજભાઈ નાનજીભાઈ અકબરી (ઉ.વ.૩૨) નામનો યુવક રાત્રે બાઈક હંકારી માધાપર ચોકડીથી મોરબી રોડ તરફ જતો હતો ત્યારે વચ્ચે આવતા સીટી પાર્ક મોલ નજીક સામેથી રોંગ સાઈડમાં આવતા ડબલસવારી બાઈક ચાલકે બાઈક અથડાવતા અકસ્માત સર્જાયો હતો. ત્રણેય બાઈકસવારો રોડ પર પટકાતા ગંભીર ઈજા થઈ હતી. બનાવના પગલે આસપાસના લોકો સહિતના દોડી આવ્યા હતા અને ૧૦૮ને જાણ કરતા તાત્કાલીક સિવિલ હોસ્પિટલમાં ખસેડવામાં આવ્યા હતા. જેમાં નિકુંજભાઈને માથામાં ગંભીર ઈજા થતાં સારવાર કારગત નિવડે તે પહેલા જ દમ તોડી દીધો હતો. જયારે સુરેશ ખેમશીભાઈ માકોઈ (ઉ.વ.૨૬) અને વિજય નિકવાલભાઈ માકોઈ (ઉ.વ.૨૫ બન્ને રહે. એમપી)ને ગંભીર ઈજા થતાં દાખલ કરવામાં આવ્યા હતા. બનાવના પગલે હોસ્પિટલ ચોકીના સ્ટાફે ગાંધીગ્રામ પોલીસને જાણ કરતા પોલીસે જરૂરી કાર્યવાહી કરી હતી.
મૃતક નિકુંજભાઈ એક બહેનથી નાના હતા અને ઈમીટેશનનું કામ કરતા હતા. સંતાનમાં એક પુત્રી છે. પરિવારના એકમાત્ર આધારસ્તભં યુવકના આકસ્મીક મોતથી પરીવારમાં કલ્પાંત સર્જાયો છે. આગળની કાર્યવાહી ગાંધીગ્રામ પોલીસે હાથ ધરી છે