રાજકોટ શહેર પોલીસ દ્વારા એક વર્ષ દરમિયાન પકડવામાં આવેલ કુલ 1.86 કરોડની કિંમતના દારૂના જથ્થા પર રોડ રોલર ફેરવી તેનો નાશ કરવામાં આવ્યો હતો.

ગુજરાત સરકાર ગૃહ વિભાગ ગાંધીનગર દ્વારા કરવામાં આવેલા ઠરાવ મુજબ રાજકોટ શહેર વિસ્તારમાં ગેરકાયદેસર રીતે પકડાયેલ દારૂના જથ્થાનો આજરોજ નાશ કરવામાં આવ્યો હતો. શહેરની ભાગોળે સાત હનુમાનથી આગળ સોખડા અને નાકરાવાડી ગામ વચ્ચે સરકારી ખરાબાવાળી જગ્યામાં દારૂના જથ્થા પર રોલર ફેરવી દેવામાં આવ્યું હતું.આ કામગીરી દરમિયાન ડીસીપી ઝોન-૧ સજનસિંહ પરમાર સહિતના પોલીસ અધિકારી અને અન્ય અધિકારીઓ તથા સ્ટાફ હાજર રહ્યો હતો.

દારૂના જથ્થાનો નાશ કરવામાં આવ્યો છે તેમાં શહેરના ઝોન-૧ પોલીસ સ્ટેશન હેઠળના વિસ્તારોમાં 215 કેસમાં ઝડપાયેલ 33,330 બોટલ તથા ઝોન-૨ હેઠળના 177 કેસમાં 818 બોટલ તથા ડીસીબી પોલીસ સ્ટેશનમાં નોંધાયેલા 49 કેસમાં ઝડપાયેલ 5342 બોટલ સહિત કુલ રૂપિયા 1,86,31,833 ની કિંમતનો 46,790 બોટલ દારૂના જથ્થા પર રોલર ફેરવી તેનો નાશ કરવામાં આવ્યો હતો.