વિશ્વના અબજોપતિઓની યાદીમાં અવારનવાર મોટા ફેરફારો થતા રહે છે, પરંતુ તાજેતરમાં ઇટાલીના એક વ્યક્તિએ કમાણીના તમામ રેકોર્ડ તોડી નાખ્યા છે. ગઈકાલે જ્યારે વિશ્વના જાણીતા અબજોપતિઓ લેરી એલિસન, માઈકલ ડેલ અને જેન્સન હુઆંગ પર ડોલરનો વરસાદ થઈ રહ્યો હતો, ત્યારે ઇટાલીના પ્લાસ્ટિક સર્જન ગિયાનકાર્લો દેવવાસિનીએ માત્ર એક જ દિવસમાં ૪૫.૯ બિલિયન ડોલર (આશરે રૂ.૪.૩૬ લાખ કરોડ)ની અધધ કમાણી કરીને આખી દુનિયાને સ્તબ્ધ કરી દીધી છે. આ અકલ્પનીય કમાણી જોઈને વિશ્વના સૌથી અમીર વ્યક્તિ ઈલોન મસ્ક પણ આશ્ચર્યચકિત થઈ ગયા છે. રસપ્રદ વાત એ છે કે આ રકમ ભારતીય શેરબજારમાં રોકાણકારોએ એક દિવસમાં ગુમાવેલી કુલ મૂડી કરતાં પણ વધારે છે.

ગિયાનકાર્લો દેવવાસિની ક્રિપ્ટોકરન્સીની દુનિયાનું એક એવું નામ છે, જે સામાન્ય રીતે લાઈમલાઈટથી દૂર રહે છે પરંતુ તેમનો પ્રભાવ ખૂબ જ પ્રચંડ છે. તેઓ વિશ્વની સૌથી મોટી સ્ટેબલકોઈન કંપની 'ટેથર'ના મુખ્ય માલિકોમાંના એક છે. બ્લૂમબર્ગ બિલિયોનેર્સ ઇન્ડેક્સના તાજેતરના અહેવાલ અનુસાર, આ બમ્પર ઉછાળા સાથે દેવવાસિનીની કુલ સંપત્તિ હવે ૬૧ બિલિયન ડોલર સુધી પહોંચી ગઈ છે, જે તેમને ક્રિપ્ટો ઉદ્યોગના સૌથી શક્તિશાળી અને પ્રભાવશાળી વ્યક્તિ બનાવે છે. આ વર્ષે તેમની સંપત્તિમાં કુલ ૪૭.૮ બિલિયન ડોલરનો વધારો થયો છે, જેમાંથી સિંહફાળો એટલે કે ૪૫.૯ બિલિયન ડોલર માત્ર સોમવારના સિંગલ ડે ટ્રેડિંગમાં જ ઉમેરાયા છે.

ગિયાનકાર્લો દેવવાસિનીની અબજોપતિ બનવા સુધીની સફર કોઈ ફિલ્મી વાર્તા જેવી છે. ઇટાલીમાં જન્મેલા દેવવાસિનીએ શરૂઆતમાં મેડિકલનો અભ્યાસ કર્યો હતો અને તેઓ વ્યવસાયે એક પ્લાસ્ટિક સર્જન હતા. થોડો સમય તબીબી ક્ષેત્રે સફળતાપૂર્વક કામ કર્યા પછી, તેમનો રસ બદલાયો અને તેમણે મેડિકલ લાઇન છોડીને કમ્પ્યુટર હાર્ડવેર તેમજ ટેક્નોલોજીના બિઝનેસમાં ઝંપલાવ્યું હતું. ટેક સેક્ટરમાં ઘણા ઉતાર-ચઢાવ જોયા બાદ, તેઓ ક્રિપ્ટોકરન્સી તરફ આકર્ષાયા અને બિટફાઇનેક્સ અને ટેથર જેવા મોટા વૈશ્વિક પ્લેટફોર્મ સાથે જોડાયા હતા. આજે તેઓ ટેથર કંપનીના મુખ્ય મગજ અને પ્રેરક બળ તરીકે ઓળખાય છે, જેનું 'યુએસડીટી' ટોકન વિશ્વભરના ક્રિપ્ટો માર્કેટમાં ટ્રેડિંગ માટે સૌથી વધુ વપરાય છે.

ગઈકાલની કમાણીના મામલામાં દેવવાસિનીએ વિશ્વના તમામ દિગ્ગજોને પાછળ છોડી દીધા હતા અને તેઓ વૈશ્વિક સ્તરે 'ટોપ ગેનર' બન્યા હતા. જોકે, તેમની કુલ નેટવર્થ ૬૧ બિલિયન ડોલરના આધારે તેઓ હાલમાં વિશ્વના ૩૪મા સૌથી ધનિક વ્યક્તિ છે. તેમની પાછળ ઓરેકલના લેરી એલિસન રહ્યા હતા, જેમની સંપત્તિ સોમવારે ૨૧.૪ બિલિયન ડોલર વધીને ૩૦૨ બિલિયન ડોલર થઈ છે અને તેઓ દુનિયાના ત્રીજા સૌથી અમીર બન્યા છે. જ્યારે ડેલ ટેક્નોલોજીસના માઈકલ ડેલની સંપત્તિમાં ૧૫.૧ બિલિયન ડોલરનો વધારો થતાં તેઓ ૨૪ બિલિયન ડોલરની નેટવર્થ સાથે અમીરોની યાદીમાં છઠ્ઠા સ્થાને પહોંચી ગયા છે.

આટલી અઢળક સંપત્તિ હોવા છતાં, ગિયાનકાર્લો દેવવાસિની તેમના અંગત જીવનને એકદમ ખાનગી રાખવા માટે જાણીતા છે. તેઓ જાહેર કાર્યક્રમોમાં ખૂબ જ ભાગ્યે જ જોવા મળે છે અને મીડિયાથી હંમેશા અંતર જાળવી રાખે છે. ક્રિપ્ટો બજારના નિષ્ણાતોનું માનવું છે કે આગામી સમયમાં જો ટેથર કંપનીનું મૂલ્યાંકન હજુ વધશે, તો દેવવાસિની ખૂબ જ ઝડપથી વિશ્વના ટોપ-૧૦ અમીરોની ક્લબમાં સામેલ થઈ જશે.