જળ શક્તિ અભિયાન, કેચ ધ રેઈન ૨.૦, સુજલામ સુફલામ જળ અભિયાન ૨૦૨૫ના દેવભૂમિ દ્વારકા જિલ્લામાં અમલીકરણ અંગેની બેઠક જિલ્લા સેવા સદન ખાતે કલેક્ટરશ્રી રાજેશ તન્નાની અધ્યક્ષતામાં યોજાઈ હતી. 

બેઠકમાં કલેક્ટરએ નિયમિતપણે તાલુકા પાણી સમિતિની બેઠકો યોજીવા સૂચના આપી હતી.  ઉપરાંત સુજલામ સુફલામ જળ અભિયાન ૨૦૨૫ અંતર્ગત માસ્ટરપ્લાન આગળ વધારવા અને સૂચિત કામો માટે પૂર્વતૈયારીઓ સુનિશ્ચિત કરવા માટે ચર્ચા કરી હતી. 

આ ઉપરાંત કેચ ધ રેઈન ૨.૦ અભિયાન અંતર્ગત વિવિધ જગ્યાઓએ રેઈન વોટર હાર્વેસ્ટિંગ માટેના કામોના આયોજન માટે ચર્ચા કરવામાં આવી હતી. કલેક્ટરએ જિલ્લાના વધુમાં વધુ ભવનોમાં રેઈન વોટર રિચાર્જ અંગેની સુવિધા સુનિશ્ચિત કરવા અપીલ કરી હતી. વધુમાં  કલેક્ટરએ હીટવેવ અને ગરમીની ઋતુમાં લોકોને તકલીફ ન પડે તે માટે પાણીને લગતી ફરિયાદો નું તાત્કાલિક નિવારણ થાય તે જોવા પાણી સમિતિને તાકીદ કરી હતી. સાથે સાથે બપોરના સમયમાં મજૂરોને તડકામાં કામ ન કરાવવામાં આવે તે જોવા અને પાણી તેમજ છાંયડો મળે તે જોવા તાકીદ કરી હતી.