રાજકોટ ગ્રામ્ય એસઓજીની ટીમે જામકંડોરણાના સોડવદર ગામની સીમમાં વાડીએ દેશી જામગરી બંદૂક સાથે સોડવદરના શખસને ઝડપી લીધો હતો. પોલીસની પૂછતાછમાં જૂનાગઢના ડફેર શખસ પાસેથી તે આ હથિયાર લાવ્યો હોવાનું અને અહીં વાડીએ રખોપુ કરતો હોય માટે હથિયાર સાથે રાખ્યાનું રટણ કયુ હતું.
જાણવા મળતી વિગતો મુજબ, રાજકોટ જિલ્લા પોલીસવડા જયપાલસિંહ રાઠોડની સૂચના હેઠળ રાજકોટ ગ્રામ્ય એસ ઓ જી પી આઈ એફ.એ.પારગીના માર્ગદર્શનમાં પીએસઆઇ બી.સી.મિયાત્રા તથા તેમની ટીમ પેટ્રોલિંગમાં હતી. દરમિયાન એએસઆઈ જયવીરસિંહ રાણા, હેડ કોન્સ્ટેબલ પ્રહલાદસિંહ રાઠોડ, અરવિંદભાઈ દાફડાને મળેલી બાતમીના આધારે જામકંડોરણા તાલુકાના સોડવદર ગામની સીમમાં ક્રિપાલસિંહ સતુભા જાડેજા (ઉ.વ ૪૨) ની વાડીએ દરોડો પાડી અહીં ક્રિપાલસિંહ જાડેજાને દેશી બનાવટની જામગરી બંદૂક સાથે ઝડપી લીધો હતો. પોલીસે .૫,૦૦૦ નું આ હથિયાર કબજે કરી આરોપી સામે જામકંડોરણા પોલીસ સ્ટેશનમાં આમ્ર્સ એકટની કલમ હેઠળ ફરિયાદ દાખલ કરાવી હતી.
પોલીસે વધુમાં જણાવ્યું હતું કે, હથિયાર સાથે ઝડપાયેલ આરોપી ક્રિપાલસિંહ અહીં પોતાની વાડીએ ખેતી કામ કરતો હોય રાત્રિના વાડીએ રખોપુ કરવા માટે હથિયાર સાથે રાખ્યું હોવાનું તેણે રટણ કયુ છે. હથિયાર કયાંથી લાવ્યો તે અંગે પૂછતાછ કરતા તેણે જૂનાગઢના ડફેર પાસેથી આ હથિયાર લીધું હોવાનું જણાવતા આ બાબતે પોલીસે વિશેષ તપાસ હાથ ધરી છે.