ફાયર ફાઇટર સહિતના કાફલાએ આગ લીધી કાબુમાં

ભાણવડ નજીક ઐતિહાસિક બરડા ડુંગરમાં કાનમેરા ખાતે એકાએક ગત રાત્રિના આગ ફાટી નીકળતા દોડધામ મચી ગઇ હતી, જો કે આગથી કોઇ નુકશાન થયું નથી, વન વિભાગ સહિત સ્થાનિકો અને ફાયર ફાઇટર સહિતનો કાફલો ઘટના સ્થળે દોડી જઇ આગને કાબુમાં લીધી હતી.

ભાણવડ-પોરબંદર હાઇવે માર્ગ ઉપર બરડા ડુંગરની ગોદમાં રાણપર ગામ નજીક કાનમેરા પર્વત આવ્યો છે, ત્યાં રાત્રિના સમયે આગ ફાટી નીકળી હતી, આગના લબકારાની જાણ થતાં રાણાવાવ તેમજ ભાણવડથી વન વિભાગ કાનમેરા પર્વત ખાતે પહોંચ્યું હતું, વન વિભાગે આગને કાબુમાં લેવા માટે સ્થાનિક ભાણવડ તેમજ ખંભાળીયાથી ફાયર ફાઇટર મંગાવ્યા હતા, ફાયર ફાઇટર સહિત વન વિભાગ અને સ્થાનિકોએ પાણીનો સતત મારો ચલાવી મહા મહેનતે આગને સંપૂર્ણ કાબુમાં લીધી હતી.

જો કે જાનહાનિ તેમજ અન્ય કોઇ નુકશાન થયું નથી, એમ વન વિભાગે જણાવ્યું હતું, બનાવની જાણ થતાં ડી.સી.એફ. અણકુમાર સહિત ટી.ડી.ઓ. બેડીયાવદરા, તેમજ આર.એફ.ઓ. દિનેશભાઇ સોલંકી, સામતભાઇ ભમર સહિતના દોડી ગયા હતા.