ભાવનગર મહાનગર પાલિકા કચેરી ખાતે બે દિવસ પહેલા મારામારીની ઘટના બની હતી. જે બનાવની વિડિઓ પણ સોશ્યલ મીડિયામાં વાયરલ થયો હતો. જોકે આ મામલે કોઈ પોલીસ ફરિયાદ થવા પામી ન હતી. ત્યારે બે દિવસ બાદ પોલીસ ફરિયાદ નોંધાઈ હતી. મહાનગરપાલિકામાં વેરો ભરવા ગયેલા કાળીયાબીડના યુવકે એક શખ્સને બાઈક પાર્ક ન કરવાનું કહી ઝપાઝપી કરી ઢીંકાપાટુનો માર મારી જાનથી મારી નાખવાની ધમકી આપી હતી. જે મારમારીનો વીડિયો વાયરલ થતા ચકચાર મચી જવા પામી હતી.

આ બનાવ અંગે પ્રાપ્ત વિગતો અનુસાર ભાવનગર શહેરના કાળીયાબીડ વિસ્તારના મોમાઈ ચોકમાં રહેતા યશવંશી બાવુભા ગોહિલે નિલમબાગ પોલીસ મથકમાં મહાવિરસિંહ કિશોરસિંહ પરમાર સામે ફરિયાદ નોંધાવી હતી કે, ગત તા. ૮ના રોજ તેઓ સવારે ૧૧ કલાકના સુમારે મહાનગર પાલિકામાં વેરો ફરવા માટે ગયા હતા. ત્યારે તેઓનું બાઈક પાર્ક કરી રહયા હતા. તે વેળાએ ઉક્ત શખ્સે અહીં બાઈક પાર્ક ન કરવા માટે કહેતા તેઓએ શુ કામ અહી પાર્ક ન કરવુ તેમ કહેતા શખ્સે ઉશ્કેરાઈ તેઓને ધક્કો મારી ઝપાઝપી કરી શર્ટ ફાડી નાખી, તેને ઢીંકાપાટુનો માર મારી આજે તો તને પતાવી દેવો છે. કહી ધમકી આપી હતી. ઉક્ત બનાવ સંદ્રભે પોલીસે શખ્સ સામે ગુનો દાખલ કરી તજવીજ હાથ ધરી હતી. જ્યારે બન્ને યુવાન વચ્ચે થયેલી મારા મારીનો વીડિયો વાયરલ થતા ભારે ચકચાર મચી જવા પામી હતી. અને મોટી સંખ્યામાં લોકો એકઠા થઈ ગયા હતા. જે બનાવ મામલે નીલમબાગ પોલીસમાં ફરિયાદ નોંધાતા પોલીસે ફરિયાદના આધારે ધોરણસરની કાર્યવાહી હાથ ધરી હતી.