ભાવનગર જિલ્લા કલેક્ટર આર. કે. મહેતાના અધ્યક્ષસ્થાને ભાવનગર જિલ્લા સંકલન તેમજ ફરિયાદ સમિતિની બેઠક કલેકટર કચેરીના આયોજન હોલ ખાતે યોજાઈ હતી.
ભાવનગર જિલ્લાની સંકલન અને ફરિયાદ સમિતિની બેઠકમાં તુમારનો નિકાલ, વસુલાતની સમીક્ષા, પેન્શન કેસો, કોનસોલિડેટેડ માહિતી, નાગરિક સુવિધા કેન્દ્ર હેઠળની અરજી, સ્વાગત કાર્યક્રમ સહિત રજૂ થયેલા પ્રશ્નો અને મુદ્દાઓ અંગે જિલ્લા કલેક્ટર આર. કે. મહેતાએ સંબંધિત અધિકારીઓને સત્વરે વિગતવાર અહેવાલ રજૂ કરવા સૂચના આપી હતી.
આ ઉપરાંત જિલ્લા કલેકટર  આર. કે. મહેતાએ સેવા સેતુ, એક પેડ મા કે નામ, સહિત સ્વચ્છતા હી સેવા અભિયાન અંગે ચર્ચા કરી હતી. જિલ્લા કલેકટરએ સરકારી કચેરીઓને સ્વચ્છ રાખવા અંગે અધિકારીઓને સૂચના આપી હતી તેમજ આ અંગે કલેકટર દ્વારા કોઈપણ સરકારી કચેરીની આકસ્મિક મુલાકાત પણ લેવામાં આવશે.
ભાવનગર જિલ્લા સેવા સદનનાં આયોજન ખંડમાં યોજાયેલી જિલ્લા સંકલન તેમજ ફરિયાદ સમિતિની આ બેઠકમાં પોલીસ અધિક્ષક  ડો. હર્ષદ પટેલ, રિજિયોનલ મ્યુનિસિપલ કમિશનર  ડી. એમ. સોલંકી, નાયબ વન સંરક્ષક સાદીક મુંજાવર, નિવાસી અધિક કલેક્ટર એન.ડી. ગોવાણી, પ્રોબેશનરી આઇ. એ. એસ.અધિકારી આયુષી જૈન, જિલ્લા ગ્રામ વિકાસ એજન્સીના નિયામક જયશ્રીબેન જરૂ, પ્રાદેશિક નગરપાલિકાની કચેરીના અધિક કલેકટર  ડી. એન. સતાણી, પ્રાંત અધિકારીઓ સહિતનાં જિલ્લા- તાલુકાના અધિકારીઓ ઉપસ્થિત રહ્યાં હતાં.