જામનગર જિલ્લાના જોડીયા તાલુકાના શામપર ગામમાં રહેતા ૭૦ વર્ષના બુઝુર્ગે પોતાની પેટની બીમારીથી કંટાળી જઈ ઝેરી દવા પી લીધી હતી, ત્યારબાદ નદીમાં ઝંપલાવી આત્મહત્યા કરી લીધી છે.

આ બનાવની વિગત એવી છે કે જોડિયાના સામપર ગામમાં રહેતા જયંતીભારથી અમર ભારથી ગોસાઈ નામના ૭૦ વર્ષના બાવાજી જ્ઞાતિના બુઝુર્ગ કે જેઓએ તાજેતરમાં પથરી નું ઓપરેશન કરાવ્યું હતું, જેનો પેટનો અસહય દુખાવો રહેતો હોવાથી તે દુખાવાની બીમારીના કારણે પોતાના ઘરમાં પડેલી ઝેરી દવા પી લીધી હતી, ત્યારબાદ ગામની નદીમાં ઝંપલાવી આત્મહત્યા કરી લીધી છે.

આ બનાવ અંગે મૃતકના પુત્ર ઉપેન્દ્રભારથી ઉર્ફે મુન્ના મહારાજ જયંતિભારથી ગોસાઈએ પોલીસને જાણ કરતાં જોડીયા પોલીસે મૃતદેહનો કબ્જો સંભાળી વધુ તપાસ હાથ ધરી છે.