મોડીરાત્રે જયારે રાજકોટવાસીઓ ઘસઘસાટ ઊંઘી રહ્યા હતાં ત્યારે શહેરના એક ખૂણે રાજકોટ મહાનગરપાલિકાની ફાયર એન્ડ ઈમરજન્સી શાખાના જાંબાઝ મરજીવાઓ એક વયોવૃદ્ધ મહિલાની જિંદગી બચાવવા સખત પરિશ્રમ કરી રહ્યા હતાં. આ ઘટના બની હતી ૩૧-૦૫-૨૦૨૫ના રોજ રાત્રે ૧૨:૩૦ વાગ્યા આસપાસ. ફાયર એન્ડ ઈમરજન્સી વિભાગને સંજયભાઈ નામના નાગરિક તરફથી એક ફોન કોલ મળે છે અને ઊંડી ખાણમાં એક વૃદ્ધા સંઘર્ષ કરી રહ્યા હોવાની જાણકારી મળતા જ ફાયર બ્રિગેડના જવાનો એક પળનો પણ વિલંબ કર્યા વગર સ્થળ લાપાસરી રોડ પર સ્થિત રણુજા મંદિરની સામે અંદાજિત ૪૦ થી ૫૦ ફૂટ ઊંડી ખાણ પાસે ઘટના સ્થળે પહોંચે છે અને પછી શરૂ થાય છે દિલધડક રેસ્ક્યુ ઓપરેશન. 

માજીને સહીસલામત બહાર કાઢ્યા
       
તા.૩૧-૦૫-૨૦૨૫ના રોજ રાત્રે ૧૨:૩૦ કલાકે આ ઘટનાની જાણકારી મળતાં જ કોઠારિયા ફાયર સ્ટેશનથી તાત્કાલિક ગણતરીની મિનિટમાં જ ફાયર એન્ડ ઇમરજન્સી શાખાની રેસ્ક્યુ ટીમ રણુજા મંદિરની સામે, લાપાસરી રોડ પર ઇંટોના ભઠ્ઠા પાસેના સ્થળ પર પહોંચી હતી. આ સાથે જ પોલિસની ટીમ પણ ઘટનાસ્થળે પહોંચી હતી. આશરે ૫૦થી ૬૦ વર્ષના માજી જોશનાબેન ખોડાભાઈ ભલગામા ૪૦થી ૫૦ ફૂટ ઊંડી ખાણમાં પડી ગ્યા હતા. ખાણમાં પાણી પણ ભરાયેલું હતું. ખાણ ઊંડી હોવાને કારણે તાત્કાલિક ફાયરની ટીમે રસ્સા (દોરડા)ની મદદથી રેસ્ક્યૂ ઓપરેશન શરૂ કર્યું હતું અને માજીને સહીસલામત બહાર કાઢ્યા હતા. 

એમ્બ્યુલન્સની મદદથી વૃધ્દ્ધાને તપાસ માટે સિવિલ ખસેડાયા

આ વૃદ્ધા લગભગ ચારેક કલાક સુધી પાણીમાં રહ્યા હોવાને કારણે રાજકોટ મહાનગરપાલિકાની ફાયર ટીમ દ્વારા ૧૦૮ એમ્બ્યુલન્સની મદદથી વૃધ્દ્ધાને તપાસ માટે સિવિલ હોસ્પિટલ મોકલી આપ્યા હતા.