હરિયાણાની 90 વિધાનસભા બેઠકો પર મતદાન થઈ રહ્યું છે. ચૂંટણી પંચે મતદાન માટે જરૂરી તમામ પ્રક્રિયા પૂર્ણ કરી લીધી હતી. રાજ્યમાં કુલ 1031 ઉમેદવારો વિધાનસભા ચૂંટણી લડી રહ્યા છે. હરિયાણામાં 20 હજારથી વધુ મતદાન કેન્દ્રો બનાવવામાં આવ્યા છે. સવારે 7 વાગ્યાથી મતદાન મથકો પર લાંબી લાઈનો જોવા મળી રહી છે. આ સાથે સાંજે પાંચ વાગ્યે તમામ ઉમેદવારોનું ભાવિ ઈવીએમમાં કેદ થઈ જશે.
હરિયાણા વિધાનસભા ચૂંટણીના પરિણામો આવતા મંગળવારે, 8 ઓક્ટોબરના રોજ જાહેર કરવામાં આવશે અને તમામ ઉમેદવારોના ભાવિનો નિર્ણય કરવામાં આવશે. આ સાથે એ પણ નક્કી થશે કે હરિયાણામાં કોની સરકાર બનશે અને કોણ મુખ્યમંત્રી બનશે.
હરિયાણા વિધાનસભા ચૂંટણી 2024 માટે ભાજપ-કોંગ્રેસ અને અન્ય પાર્ટીઓએ તેમના જૂના નેતાઓ પર જ વિશ્વાસ નથી દશર્વ્યિો પરંતુ નવા ઉમેદવારોને ટિકિટ પણ આપી છે. ચૂંટણી મેદાનમાં ઘણા મોટા ચહેરાઓ છે જેમ કે મુખ્યમંત્રી નયબ સિંહ સૈની, પૂર્વ ગૃહ મંત્રી અનિલ વિજ, પૂર્વ સીએમ ભૂપેન્દ્ર સિંહ હુડ્ડા, દીપેન્દ્ર સિંહ હુડ્ડા, દુષ્યંત ચૌટાલા, પૂર્વ કુસ્તીબાજ વિનેશ ફોગટ, કવિતા દલાલ. હરિયાણાની વિધાનસભા ચૂંટણીમાં શાસક પક્ષ ભાજપ્ની નજર હેટ્રિક પર છે, જ્યારે કોંગ્રેસને દાયકા પછી સત્તામાં પરત ફરવાની આશા છે.
હરિયાણાના મુખ્ય ચૂંટણી અધિકારી પંકજ અગ્રવાલે જણાવ્યું હતું કે રાજ્યમાં કુલ 2,03,54,350 મતદાતા છે. તેમા 8821 મતદાતા તો સદી ફટકારી ચૂક્યા છે અને તે મતદાન કરશે.