જેતપુરના કુખ્યાત બુટલેગર અનીલ ઉર્ફે ડબલીના મકાનમાં રાજકોટ એલસીબીની ટીમે દરોડો પાડી અહીં ભોયતળિયામાં બનાવેલા ખાસ ચોરખાનામાંથી રૂપિયા 10.60 લાખની કિંમતનો દારૂ બિયરનો જથ્થો ઝડપી લીધો હતો. દરોડા દરમિયાન બુટલેગર હાજર ન મળી આવતા પોલીસે તેને ઝડપી લેવા માટે શોધખોળ શરૂ કરી છે.

દારૂના આ દરોડાની જાણવા મળતી વિગતો મુજબ, રાજકોટ જિલ્લા પોલીસ વડા જયપાલસિંહ રાઠોડની સુચના હેઠળ રાજકોટ ગ્રામ્ય એલસીબી પીઆઇ વી.વી.ઓડેદરાની રાહબરી હેઠળ પીએસઆઇ ડી.જી.બડવા તથા તેમની ટીમ પેટ્રોલિંગમાં હતી દરમિયાન હેડ કોન્સ્ટેબલ નિલેશભાઈ ડાંગર અને દિવ્યેશભાઈ સુવાને મળેલી સચોટ બાતમીના આધારે જેતપુરના ડોબરીયા વાડી વિસ્તારમાં રહેતા કુખ્યાત બુટલેગર અનિલ ઉર્ફે ડબલી મનસુખભાઈ બારૈયાના મકાનમાં પોલીસે દરોડો પાડ્યો હતો.
પોલીસે અહીં મકાનમાં તપાસ કરતા ભોયતળિયામાં ખાસ મોટું ચોરખાનું બનાવ્યું હોય જેમાંથી પોલીસે નાની મોટી દારૂની 6754 બોટલ અને 408 બિયરના ટીન સહિત 10.60 લાખની કિંમતનો દારૂનો જથ્થો ઝડપી લીધો હતો. ઉપરાંત અલગ અલગ કંપ્નીના સ્ટીકરો અને સ્ટીકર વગરની બે બોટલ સહિત કુલ રૂપિયા 10,60,150 નો મુદ્દામાંલ પોલીસે કબજે કર્યો હતો. દરોડા સમયે આરોપી હાજર મળી આવ્યો ન હોય પોલીસે દારૂનો આ જથ્થો કબજે કરી કુખ્યાત બુટલેગર અનીલ ઉર્ફે ડબલી સામે વધુ એક ગુનો નોંધી તેને ઝડપી લેવા શોખખોળ શરૂ કરી છે.