ચૂંટણી પ્રક્રિયા દરમિયાન પરવાનાવાળા હથિયારો સાત દિવસમાં જમા કરાવવા જિલ્લા મેજિસ્ટ્રેટશ્રી પી.બી.પંડ્યાનો આદેશ

આ આદેશ અનુસાર, જામનગર જિલ્લાના તમામ આત્મરક્ષણ તથા પાકરક્ષણના પરવાનેદારોએ પોતાના હથિયારો દિન-૭માં સંબંધિત પોલીસ સ્ટેશનમાં જમા કરાવી તેની પહોંચ મેળવી લેવાની રહેશે.

​આ જાહેરનામામાં કેટલાક ચોક્કસ કિસ્સાઓમાં હથિયાર જમા કરાવવામાંથી મુક્તિ આપવામાં આવી છે, જેમાં ફરજ પરના મેજિસ્ટ્રેટશ્રીઓ, સરકારી અધિકારીઓ/કર્મચારીઓ, બેંકના રક્ષણ માટે નિયુક્ત સિક્યુરીટી ગાર્ડ, રાષ્ટ્રીયકૃત બેંકો કે એટીએમ સાથે સંકળાયેલી એજન્સીઓના હથિયારધારી ગાર્ડ તેમજ મોટા ઔદ્યોગિક એકમો અને વીજ કંપનીઓના સિક્યુરીટી સ્ટાફનો સમાવેશ થાય છે. આ મુક્તિ મેળવનાર ખાનગી સિક્યુરીટી ગાર્ડ પાસે સંબંધિત બેંક કે કંપનીના મેનેજરનું ફોટોગ્રાફ સાથેનું પ્રમાણપત્ર હોવું અનિવાર્ય છે. જિલ્લા મેજિસ્ટ્રેટના આદેશ મુજબ, ચૂંટણી પ્રક્રિયા પૂર્ણ થયા બાદ સાત દિવસમાં સંબંધિત પોલીસ સ્ટેશને તમામ હથિયારો પરવાનેદારોને પરત સોંપવાની કાર્યવાહી કરવાની રહેશે. આ હુકમનો ભંગ કરનાર સામે શસ્ત્ર અધિનિયમની કલમ-૩૦ તથા ભારતીય ન્યાય સંહિતા, ૨૦૨૩ની કલમ-૨૨૩ હેઠળ કડક શિક્ષાત્મક પગલાં લેવામાં આવશે.