જામનગરમાં ખોડલધામ પરિવાર દ્વારા 'રાંદલ લોટા ઉત્સવ' યોજાયો: હજારો ભક્તોએ દર્શન, પૂજન, મહાઆરતી અને મહાપ્રસાદનો લાભ લીધો...

જામનગરમાં શ્રી ખોડલધામ જિલ્લા સમિતિ અને મંદિર સમિતિ દ્વારા ચોથા વાર્ષિક 'રાંદલ માં લોટા ઉત્સવ'નું આયોજન કરવામાં આવ્યું હતું. રણજીતસાગર રોડ સ્થિત ખોડીયાર પાર્ક સોસાયટીના કોમન પ્લોટ ખાતે યોજાયેલા આ મહોત્સવમાં જામનગર અને આસપાસના વિસ્તારોમાંથી હજારો ભક્તો ઉમટી પડ્યા હતા.

કાર્યક્રમની શરૂઆત શાસ્ત્રોક્ત વિધિ-વિધાન સાથે પૂજન-અર્ચનથી થઈ હતી. મોટી સંખ્યામાં માઇભક્તોએ આ પૂજનમાં સહભાગી થઈ માતાજીના દર્શન કર્યા હતા.

ઉત્સવ દરમિયાન મહિલા સત્સંગ મંડળો દ્વારા ભક્તિ ગીતો અને કીર્તન રજૂ કરવામાં આવ્યા હતા. સાંજે મહાઆરતીનું આયોજન થયું હતું, જેમાં ભક્તોએ દર્શનનો લાભ લીધો હતો.

રાત્રિના સમયે ખેલૈયાઓએ પરંપરાગત ગરબા અને મહારાસ રજૂ કર્યા હતા, જેનાથી વાતાવરણ ભક્તિમય બન્યું હતું. ધાર્મિક મહોત્સવના અંતે ખોડલધામ પરિવાર દ્વારા મહાપ્રસાદ (ભંડારા)નું આયોજન કરવામાં આવ્યું હતું.
​​​​​​​

વ્યવસ્થિત વ્યવસ્થાને કારણે હજારો ભક્તોએ શાંતિપૂર્વક પ્રસાદ ગ્રહણ કર્યો હતો. ખોડલધામ પરિવાર અને મંદિર સમિતિના સ્વયંસેવકોએ આ કાર્યક્રમને સફળ બનાવવા માટે યોગદાન આપ્યું હતું.