અવેડાનો ઉકેડો અને અરજી બાબતે શખ્સ વિફર્યો

જામનગર તાબેના મોટી લાખાણી ગામમાં અવેડાનો ઉકેડો સાફ કરાવવા અને તલાટીને આપેલી અરજીના મનદુ:ખમાં ગામમાં રહેતા શખ્સે ઉશ્કેરાઇને ભરવાડ યુવાનને ઢીકાપાટુનો માર મારી ધમકી દીધાનો મામલો પોલીસ મથકે પહોચ્યો છે આ મામલે ગરાસીયા શખ્સ સામે ફરીયાદ નોંધાવવામાં આવી છે.
જામનગર તાલુકાના મોટી લાખાણી ગામમાં રહેતા નાગરાજ સોડાભાઇ ઝાપડા (ઉ.વ.૪૦)એ ગઇકાલે પંચ-એમાં મોટી લાખાણી ગામના જયુભા પ્રવિણસિંહ જાડેજા વિરુઘ્ધ જુદી જુદી કલમ મુજબ ફરીયાદ નોંધાવી હતી.
આરોપી જયુભાએ ગઇકાલે ફરીયાદી નાગરાજભાઇને તું ગામના જુના અવેડા ઉપરનો ઉકેડો સાફ કરાવી નાખજે અને ગઇકાલે તું તલાટી મંત્રીને પાણીની અરજી આપવા કેમ ગયો હતો તેમ કહીને અપશબ્દો બોલી ઉશ્કેરાઇ જઇ ઝપાઝપી કરી હતી તેમજ ઢીકાપાટુનો માર મારીને ફરીયાદીને જાનથી મારી નાખવાની ધમકી દીધી હતી.