આગામી રવિવાર તારીખ 4 ના રોજ પવિત્ર હરિયાળી અમાસ (દિવાસા) નિમિત્તે ખંભાળિયામાં જુદા જુદા સ્થળોએ ધાર્મિક કાર્યક્રમનું આયોજન કરવામાં આવ્યું છે. મુંબઈના જાણીતા સેવાભાવી જયાબેન કુમનદાસ અમલાણી ચેરીટેબલ ટ્રસ્ટના ઉપક્રમે રવિવાર તારીખ 4 ના રોજ અહીંના જલારામ મંદિર ખાતે સવારે 10 વાગ્યાથી સાંજે 7 વાગ્યા સુધી અન્નકૂટના દર્શન તેમજ સાંજે 7 વાગ્યે મહાદેવના મંદિરે દીપમાળાના દર્શન યોજવામાં આવ્યા છે. આ વચ્ચે સાંજે 5 વાગ્યે મહિલાઓ માટે નૂતન ધ્વજારોહણ કાર્યક્રમનું પણ આયોજન કરવામાં આવ્યું છે. આ તમામ ધાર્મિક કાર્યક્રમમાં સહભાગી થવા ધર્મપ્રેમી જનતાને જયાબેન કુમનદાસ અમલાણી ચેરીટેબલ ટ્રસ્ટ વતી સૌરાષ્ટ્ર ઝોનના ટ્રસ્ટી શ્રીમતી સપનાબેન મુકેશભાઈ કાનાણી દ્વારા અનુરોધ કરવામાં આવ્યો છે.