ભારતના અવકાશયાત્રી ગ્રુપ કેપ્ટન શુભાંશુ શુક્લા ટૂંક સમયમાં ઇતિહાસ રચવા જઈ રહ્યા છે અને એ રીતે ભારતને સુવર્ણ સિદ્ધી અપાવવા જઈ રહ્યા છે. તેઓ ૧૧ જૂન, ૨૦૨૫ ના રોજ બપોરે ૧૨:૩૦ વાગ્યે ઇન્ટરનેશનલ સ્પેસ સ્ટેશનમાં જોડાશે. આ મિશન એક્સિઓમ -4 નો એક ભાગ છે, જે ભારત અને અમેરિકા વચ્ચેના અવકાશ સહયોગનું પરિણામ છે.

શુભાંશુ શુક્લાનું મિશન અગાઉ ૮ જૂને શરૂ થવાનું હતું, પરંતુ ખરાબ હવામાન પરિસ્થિતિઓ અને અવકાશયાનની અંતિમ તૈયારીઓને કારણે તેને ૧૦ જૂન સુધી મુલતવી રાખવામાં આવ્યું હતું. નાસા અને સ્પેસએક્સ ટીમોએ જણાવ્યું હતું કે ફાલ્કન ૯ રોકેટ અને ડ્રેગન અવકાશયાનની હવામાન આગાહી અને પરિવહન પ્રક્રિયાને ધ્યાનમાં રાખીને આ ફેરફાર કરવામાં આવ્યો છે. હવે લોન્ચ 10 જૂને થશે. 11 જૂને બપોરે 12:30 વાગ્યે આઈએસએસ સાથે જોડાણ થશે.એક્સિઓમ -4 મિશન સ્પેસએક્સનું 53મું ડ્રેગન મિશન હશે. આ 15મું માનવ અવકાશ મિશન અને 48મી આઈએસએસ ટ્રીપ હશે. શુભાંશુ શુક્લા ભારતના ગગનયાન કાર્યક્રમના ચાર અવકાશયાત્રીઓમાંના એક છે.

ભારતે આ મિશન પર 548 કરોડનો ખર્ચ કર્યો

ભારતે અત્યાર સુધીમાં આ મિશન પર ઓછામાં ઓછા 548 કરોડ રૂપિયા ખર્ચ્યા છે. આમાં લોન્ચ તેમજ શુભાંશુ શુક્લા અને તેમના બેકઅપ ગ્રુપ કેપ્ટન પ્રશાંત નાયરની તાલીમનો સમાવેશ થાય છે. પ્રશાંત નાયર ગગનયાન કાર્યક્રમનો પણ એક ભાગ છે. શુભાંશુને સ્પેસએક્સ અને એક્સીઓમ સ્પેસ દ્વારા ખાસ તાલીમ આપવામાં આવી છે.

અવકાશમાં 7 જૈવિક પ્રયોગ હાથ ધરશે

આઈએસએસ પહોંચ્યા પછી, શુભાંશુ 7 પ્રયોગો કરશે, જે ભારતીય શૈક્ષણિક સંસ્થાઓ દ્વારા બનાવવામાં આવ્યા છે. આમાંથી મોટાભાગના જૈવિક પ્રયોગો હશે, જેમ કે છોડના બીજ અને માનવ શરીર પર સૂક્ષ્મ ગુરુત્વાકર્ષણની અસર ચકાસવામાં આવશે. આ ઉપરાંત, તે નાસા સાથે 5 વધુ પ્રયોગો કરશે, જે માનવ સંશોધન સાથે સંબંધિત છે. ઈસરો પ્રોજેક્ટ ડિરેક્ટર સુદીશ બાલને જણાવ્યું હતું કે આ પ્રયોગો ભારતીય વૈજ્ઞાનિકો દ્વારા પ્રસ્તાવિત કરવામાં આવ્યા છે.નાસા સાથે સહયોગમાં માનવ સંશોધનના 5 પ્રયોગો પણ કરવામાં આવશે.

અવકાશયાન અને નામ ટુક સમયમાં જાહેર થશે

એક્સિઓમ-4 મિશન માટે ઉપયોગમાં લેવાતું ડ્રેગન અવકાશયાન સંપૂર્ણપણે નવું છે. સ્પેસએક્સના ડ્રેગન મિશન મેનેજમેન્ટ ડિરેક્ટર સારાહ વોકરે જણાવ્યું હતું કે આ અવકાશયાનને ક્રૂ દ્વારા નામ આપવામાં આવશે. કમાન્ડર પેગી વ્હિટસને ગયા અઠવાડિયે કહ્યું હતું કે નવું નામ ટૂંક સમયમાં જાહેર કરવામાં આવશે.

ટ્રમ્પ-મસ્ક વિવાદની અસર

તાજેતરમાં સ્પેસએક્સના સ્થાપક ઈલોન મસ્ક અને યુએસ પ્રમુખ ડોનાલ્ડ ટ્રમ્પ વચ્ચે વિવાદ થયો હતો. પરંતુ નાસા અને એક્સિઓમે સ્પષ્ટતા કરી હતી કે આ મિશનને અસર કરશે નહીં. બંને પક્ષોએ જાહેરમાં સમયરેખાનું પાલન કર્યું છે. તેથી આ મિશન સરળતાથી ચાલશે.શુભાંશુ શુક્લાનું આ મિશન ભારતના અવકાશ કાર્યક્રમમાં એક મોટું પગલું છે. ગગનયાન મિશનની તૈયારી માટે તેમનો અનુભવ ખૂબ ઉપયોગી થશે. જ્યારે તેઓ 11 જૂને આઈએસએસ માં જોડાશે, ત્યારે આખું ભારત તેમની સાથે રહેશે. આ મિશન માત્ર વૈજ્ઞાનિક પ્રગતિ જ નહીં પરંતુ ભારતને અવકાશમાં નવી ઊંચાઈઓ પર પણ લઈ જશે.