સિહોર પોલીસ આવતા દિવસોમાં ભાડુઆત નોંધણી અને પરપ્રાંતીય મજૂરોના વેરીફિકેશન અંગે વિશેષ ઝુંબેશ હાથ ધરનાર છે. 
આ ઝુંબેશ દરમિયાન જાહેરનામાનું ઉલ્લંઘન કરનાર લોકો સામે ગુના નોંધવામાં આવશે. જિલ્લા વહીવટી તંત્ર દ્વારા વારંવાર જાહેરનામા બહાર પાડવામાં આવે છે. આ જાહેરનામા અનુસાર, મકાન કે દુકાન ભાડે આપનાર વ્યક્તિઓએ ભાડુઆતની વિગતો અને પરપ્રાંતીય મજૂરોનું વેરીફિકેશન નજીકના પોલીસ સ્ટેશનમાં ફરજિયાત નોંધાવવાનું હોય છે. જિલ્લાના એસપી હર્ષદ પટેલ અને પાલીતાણા ડીવાયએસપી મિહિર બારૈયાએ આ વિશેષ કાર્યવાહીના આદેશ આપ્યા છે. 
તેમનો ઉદ્દેશ દેશવિરોધી, ત્રાસવાદી કે અસામાજિક તત્વોને ગુનાહિત પ્રવૃત્તિઓ કરતા અટકાવવાનો છે. જેના ભાગરૂપે સિહોરના પીઆઈ જાડેજા દ્વારા પોલીસ મથકની અલગ-અલગ ટીમો બનાવવામાં આવશે. આ ટીમો વિશેષ ચેકિંગ ઝુંબેશ ચલાવી ભાડુઆત નોંધણી અને પરપ્રાંતીય મજૂરોનું વેરીફિકેશન કરાવ્યા વગર મકાન કે દુકાન આપનાર વ્યક્તિઓ સામે કાર્યવાહી કરશે. આ કાર્યવાહીને લઈ જાહેરનામાનું ઉલ્લંઘન કરનારા લોકો સામે ગુન્હો પણ દાખલ થશે તેમ સિહોર પોલીસ સૂત્રોએ જણાવ્યું હતું.