સમગ્ર વિશ્વમાં 22 એપ્રિલના રોજ પૃથ્વીને ગ્લોબલ વોર્મિંગના પ્રભાવથી બચાવવા, સસ્ટેનેબલ જીવનશૈલી અપનાવવા ના હેતુસર "વર્લ્ડ અર્થ ડે" ની ઉજવણી કરવામાં આવે છે. આ વર્ષે "વર્લ્ડ અર્થ ડે" ની થીમ "Planet Vs Plastic" રાખવામાં આવી છે. દેવભૂમિ દ્વારકા ડી. એલ.એસ.એ. (DLSA)ના ચેરમેન શ્રી એસ.વી. વ્યાસના માર્ગદર્શન હેઠળ ખંભાળિયામાં જિલ્લા અદાલતના પ્રાંગણમાં વૃક્ષારોપણના કાર્યક્રમનું આયોજન કરવામાં આવ્યું હતું.

આ કાર્યક્રમમાં જિલ્લા હેડક્વાર્ટર ખાતે ફરજ બજાવતા ન્યાયાધીશશ્રીઓ, કર્મચારીઓ, જિલ્લા સરકારી વકીલો એ.પી.પી., DLSAના ડિફેન્સ કાઉન્સિલર, મીડિયેટરો, પેનલ એડવોકેટો હાજર રહ્યા હતા.

આ ઉપરાંત વકીલ મંડળના હોદ્દેદારો તથા અન્ય સભ્યો ઉપસ્થિત રહી વૃક્ષારોપણના કાર્યક્રમમાં સહભાગી થયા હતા. હાજર રહેલા તમામ મહાનુભાવોએ પૃથ્વીને ગ્લોબલ વોર્મિંગના સંકટમાંથી બચાવવા માટે સસ્ટેનેબલ જીવનશૈલી અપનાવવાની પ્રતિજ્ઞા લીધી હતી. આવી જ રીતે દેવભૂમિ દ્વારકા જિલ્લાના ભાણવડ, કલ્યાણપુર, દ્વારકા અને ઓખા તાલુકા મથકે આવેલ અદાલતમાં પણ TLSC ના ચેરમેનશ્રીના માર્ગદર્શન હેઠળ અદાલત પરિસરમાં વૃક્ષારોપણના કાર્યક્રમનું આયોજન કરી "વર્લ્ડ અર્થ ડે" ની સવિશેષ ઉજવણી કરવામાં આવી હતી. જેમાં તાલુકાના તમામ ન્યાયાધીશ, કર્મચારીઓ, પેનલ અને રીટેનર વકીલો તથા વકીલ બારના સભ્યોએ સામેલ થઈને કાર્યક્રમને સફળ બનાવ્યો હતો.

સમગ્ર જિલ્લામાં આ વૃક્ષારોપણના કાર્યક્રમનું સુંદર આયોજન થઈ શકે તે માટે નાયબ વન સંરક્ષણ દ્વારા કચેરી (સામાજિક વનીકરણ વિભાગ) ના ડી.સી.એફ. અરુણ કુમાર દ્વારા નોડલ ઓફિસરને જરૂરી સૂચના આપી, સમગ્ર જિલ્લામાં સુચારુ રૂપે આયોજન થઈ શકે તે માટે તાલુકા ખાતેના આર.એફ.ઓ.ને ડી.એલ.એસ.એ./ ટી.એલ.એસ.સી. માં સંકલનમાં રહીને કામગીરી કરવા જરૂરી સુચના આપવામાં આવી હતી. સમગ્ર જિલ્લા નાયબ વન સંરક્ષણ કચેરી (સામાજિક વનીકરણ વિભાગ) દ્વારા વિવિધ પ્રકારના વૃક્ષો, ઔષધી, ફળ- ફૂલ તથા બહુહેતુક પ્રકારના છોડ, રોપાઓ પૂરા પાડવામાં આવ્યા હતા.

ખંભાળિયાની જિલ્લા અદાલત તથા તાલુકા ખાતે ફરજ બજાવતા સફાઈ કામદારો દ્વારા આ કાર્યક્રમને સફળ બનાવવા વિશેષ જહેમત ઉપાડી હતી અને આ વૃક્ષોના જતનની જવાબદારી આ તકે તેઓના શીરે લીધી હતી. આમ, આ કાર્યક્રમમાં લગત કર્મચારીઓ તથા મલ્ટીપલ સ્ટેકહોલ્ડર્સના સંયુક્ત પ્રયાસથી સફળ રહ્યો હતો. જે DLSA ના સચિવની અખબાર યાદીમાં જણાવવામાં આવ્યું છે.