બારા જમુનેશપ્રભુજીની બેઠકમાં પણ ફૂલડોલ ઉત્સવ ધામધૂમપૂર્વક મનાવાયો

સલાયામાં તેમજ આજુબાજુના વિસ્તારોમાં ધુળેટીના પવિત્ર દિવસે ધામધૂમ પૂર્વક ફૂલડોલ ઉત્સવનું આયોજન કરાયું હતું. જેમાં સલાયાની શ્રી દ્વારકાધીશજિની હવેલીમાં તેમજ શ્રી રામ મંદિરમાં બપોરે ફુલડોલ ઉત્સવ યોજાયો હતો. જેમાં ઠાકોરજીને સંગે વૈષ્ણવોએ પણ ભાતભાતના કલરોથી રંગોત્સવ મનાવ્યો હતો. મુખ્યાજી વામનભાઈ તેમજ રામમંદિરના મુખ્યાજી પ્રવિણભાઇએ ઠાકોરજીને શ્વેત રંગના વસ્ત્રોના શણગાર કરી અલૌકિક દર્શનનો લાભ લેવડાવ્યો હતો.

સલાયા પાસે આવેલ બારા ગામે જમુનેશ મહાપ્રભુજીની બેઠક આવેલી છે. જેમાં અદાશ્રી કિશોર અદા દ્વારા ઠાકોરજીને વિવિધ શણગાર કરવામાં આવ્યા હતાં. તેમજ ભજન કિર્તન સાથે ધામધૂમ પૂર્વક ફૂલડોલ ઉત્સવ યોજાયો હતો. બાદમાં સર્વે વૈષ્ણવોં દ્વારા મહાપ્રસાદનું આયોજન કરવામાં આવ્યું હતું. આમ સલાયા તેમજ આજુબાજુના ધાર્મિક સ્થાનોમાં ભાવભેર ફૂલડોલ ઉત્સવ ઉજવાયો હતો.