જામનગર તાલુકાના ખીમરાણા ગામમાં રહેતા અને ખેતી કામ કરતા ધરમશીભાઈ ડાયાભાઈ માંડવીયા નામના ૬૪ વર્ષના સતવારા જ્ઞાતિના ખેડૂત બુઝુર્ગ, કે જેઓએ પોતાના માથા પર લાકડાના ધોકા વડે હુમલો કરી માથું ફોડી નાખવા અંગે પોતાના પિતરાઈ ભાઈ ઓધવજીભાઈ તરસીભાઇ માંડવીયા સામે પંચકોશી એ. ડિવિઝન પોલીસ મથકમાં ફરિયાદ નોંધાવી છે. જયારે તેઓને માથામાં ઈજા થઈ હોવાથી જામનગરની સરકારી હોસ્પિટલમાં સારવાર લેવી પડી છે.

 પોલીસ ફરિયાદમાં જાહેર કરાયા અનુસાર ફરિયાદી અને આરોપી બંને પિતરાઈ ભાઈઓ વચ્ચે પોતાની વાડીમાં પાણીના નિકાલના પ્રશ્ને અગાઉ તકરાર થઈ હતી, અને બંને વચ્ચે મન દુઃખ ચાલતું હતું. જેમાં પોતાના જ્ઞાતિ પરિવાર વચ્ચે સમાધાન થયું હતું, પરંતુ તે સમાધાન આરોપી ઓધવજીભાઈ ને મંજૂર ન હોવાથી તેનો ખાર રાખીને આ હુમલો કરી દીધો હોવાનું પોલીસમાં જાહેર થયું છે.