રૂા. ૧.૭૨ લાખનો મુદ્દામાલ કબજેઃ આરોપી ફરાર
દ્વારકાથી આશરે 15 કિલોમીટર દૂર વસઇ ગામની સીમ વિસ્તારમાં રહેતા કુંભાભા વાઘેર નામના એક શખ્સના કબજાના ખેતરમાં દ્વારકાના ડીવાયએસપી સ્ટાફ દ્વારા મોડી રાત્રીના સમયે કરવામાં આવેલી દરોડાની કાર્યવાહીમાં આ સ્થળે દેશી દારૂ ગાળવાની ભઠ્ઠી મળી આવી હતી.
દેશી દારૂની આ ભઠ્ઠીમાંથી પોલીસે ૪૦૦ લીટર દેશી દારૂ ૨૭૬૦ લીટર દારૂનો કાચો આથો, ૧૦૦ લીટર દારૂ બનાવવાનો બળેલો આથો, અખાધ ગોળના ૧૦ ડબ્બા, ત્રાંબાની નળી, ગેસનો ચૂલો, ગેસ સિલિન્ડર, વિગેરે મળી, કુલ રૂપિયા ૧.૭૨.૨૦૦ નો મુદ્દામાલ કબજે કર્યો હતો.
જો કે આ દરોડા દરમિયાન આરોપી કુંભાભા વાઘેર અને લખમણભા નથુભા માણેક પોલીસને હાથ લાગ્યા ન હતા. જે અંગે દ્વારકા પોલીસ મથકમાં ગુનો નોંધાયો છે.
ઓખા-મીઠાપુરના નામચીન બૂટલેગરોના નામ ખુલશે...!
દ્વારકાના વસઇ ગામથી ઝડપાયેલી દારૂની ફેક્ટરી માં બનતો દારૂની સપ્લાય ક્યાં અને કોને કરવામાં આવતી હતી તેની તતસ્થ તપાસ થાય તો ઓખા અને મીઠાપુરમાં નામચીન બૂટલેગરોના નામ ખૂલે તે પણ ચોક્કસ વાત છે.
ઓખા-મીઠાપુરમાં દારૂનો દુકાળ...?
દ્વારકાના વસઇ ગામથી ઝડપાયેલી દારૂની ફેક્ટરીનો મોટા ભાગનો માલ ઓખા અને મીઠાપુરમાં જ સપ્લાય થયો હોવાનું જાણકારો કહી રહ્યા છે આ ફેક્ટરી પર ડીવાયએસપી ટીમ દ્વારા દરોડો પાડયા બાદ ઓખા મીઠાપુરમાં દારૂનો દુકાળ થયો હોય તેમ બુટલેગરો પોતાના ગ્રાહક સાચવવા અન્ય તાલુકામાંથી દારૂની શોધખોળ કરતા હોવાનુ જાણવા મળ્યુ છે.
