કલ્યાણપુર તાલુકાના રાવલ ગામે રહેતા દિનેશભાઈ ભીખાભાઈ પરમાર નામના 34 વર્ષના યુવાન પર મરચાની ભૂકી છાંટીને હુમલો કર્યાની તથા બિભત્સ ગાળો કાઢી, જાનથી મારી નાખવાની ધમકી આપવા સબબ આજ વિસ્તારમાં રહેતા લાખા રણમલભાઈ મકવાણા, જેસા અરસીભાઈ પરમાર, લક્ષ્મીબેન રામશીભાઈ જાદવ અને રાણીબેન જેસાભાઈ પરમાર સામે ફરિયાદ નોંધાઈ છે.

ફરિયાદી દિનેશભાઈએ આરોપી જેસાભાઈની વાડી ખેતર ભાગમાં વાવેતર કરવા માટે રાખી હતી. જેથી આરોપી જેસાભાઈએ ફરિયાદી દિનેશભાઈને ખેતર ખાલી કરી આપવાનું કહેતા ફરિયાદી દિનેશભાઈએ વાવણીમાં થયેલી નુકસાનીની રકમ ચૂકવી આપવાનું કહેતા આ બાબતે થયેલી બોલાચાલી બાદ ઉપરોક્ત બનાવ બન્યો હોવાનું પોલીસ ફરિયાદમાં જાહેર થયું છે. કલ્યાણપુર પોલીસે બે મહિલાઓ સહિત તમામ ચાર આરોપીઓ સામે આઈ.પી.સી. કલમ 323, 504, 506 (2) તથા 114 મુજબ ગુનો નોંધ્યો છે.

ખંભાળિયામાં વૃદ્ધાને હૃદયરોગનો જીવલેણ હુમલો

ખંભાળિયાના શક્તિનગર વિસ્તારમાં રહેતા ગુલાબબેન ચૈથીરામભાઈ ગોડ નામના 61 વર્ષના વૃદ્ધાને ગઈકાલે શુક્રવારે હૃદયરોગનો ઘાતક હુમલો આવી જતા તેમનું મૃત્યુ નિપજ્યું હોવાની જાણ મૃતકના પુત્ર અજયભાઈએ અહીંની પોલીસને કરી છે.