અમેરિકા અને ચીન વચ્ચેનું ટેરિફ યુદ્ધ વધુ તીવ્ર બન્યું છે. અમેરિકાએ હવે ચીન પર 100% વધારાનો ટેરિફ લગાવી દીધો છે. આ સાથે જ અમેરિકામાં આયાત થતા ચીની માલસામાન પર કુલ ટેરિફ 245% થઈ ગયો છે. ચીને 11 એપ્રિલના રોજ અમેરિકી માલસામાન પર 125% ટેરિફ લગાવ્યો હતો, જેના જવાબમાં ટ્રમ્પે આ નવો ટેરિફ લગાવ્યો છે. મહત્વનું છે કે, આ પહેલા ચીને કહ્યું હતું કે હવે તે અમેરિકા દ્વારા લગાવવામાં આવતા કોઈપણ વધારાના ટેરિફનો જવાબ નહીં આપે.

ચીને કહ્યું- અમેરિકા સાથે ટ્રેડ વોરથી નથી ડરતા

અમેરિકા તરફથી નવા ટેરિફની જાહેરાત બાદ ચીને કહ્યું કે અમે અમેરિકા સાથે ટ્રેડ વોર કરવાથી ડરતા નથી. ચીને ફરી કહ્યું કે અમેરિકાએ વાતચીત કરવી જોઈએ. આ પહેલા ડોનાલ્ડ ટ્રમ્પે કહ્યું હતું કે ચીને વાતચીતની શરૂઆત કરવી પડશે.

ચીનના વિદેશ મંત્રાલયના પ્રવક્તા લિન જિયાને કહ્યું કે જો અમેરિકા ખરેખર સંવાદ અને સમજૂતી દ્વારા મુદ્દાને ઉકેલવા માંગે છે, તો તેણે કારણ વગરનું દબાણ બનાવવાનું, ડરાવવાનું અને બ્લેકમેલ કરવાનું બંધ કરવું જોઈએ અને ચીન સાથે સમાનતા, સન્માન અને પરસ્પર હિતના આધારે વાત કરવી જોઈએ.

લિન જિયાને પત્રકારોને કહ્યું કે 245% અમેરિકી ટેરિફ હેઠળ અલગ-અલગ ટેક્સ રેટ શું હશે, તે તમે અમેરિકાને જ પૂછો. આ ટેરિફ વોર અમેરિકાએ શરૂ કર્યું છે, અમે નહીં. અમે માત્ર અમેરિકાના એક્શનનો જવાબ આપી રહ્યા છીએ. અમારા પગલાં સંપૂર્ણપણે તાર્કિક અને કાયદેસર છે. અમે અમારા દેશના અધિકારો અને આંતરરાષ્ટ્રીય વેપારમાં પ્રામાણિકતા જાળવવાનો પ્રયાસ કરી રહ્યા છીએ.