જામનગરના રણજીત સાગર રોડ પર ગણેશવાસમાં રહેતા એક આઘેડે પોતાના એકલવાયા જીવનથી કંટાળી જઇ પોતાના ઘેર ગળાફાંસા દ્વારા આત્મહત્યા કરી લઇ પોતાની જિંદગીનો અંત લાવી દીધો છે.

આ બનાવની વિગત એવી છે કે જામનગરમાં રણજીતસાગર રોડ પર ગણેશવાસ વિસ્તારમાં રહેતા દામજીભાઈ કુંભાભાઇ સાગઠીયા નામના આધેડે ગઈ કાલે પોતાના ઘેર ગળાફાંસા દ્વારા આપઘાત નો પ્રયાસ કરતાં તેઓને બેશુદ્ધ અવસ્થામાં સારવાર માટે જામનગરની સરકારી જી.જી. હોસ્પિટલમાં ખસેડવામાં આવ્યા હતા, ત્યાં ફરજ પરના તબીબે તેનું મૃત્યુ નિપજયું હોવાનું જાહેર કર્યું હતું.

આ બનાવ અંગે સોમાભાઈ વાલાભાઈ એ પોલીસને જાણ કરતાં સિટી એ. ડિવિઝનના પોલીસ હેડ કોન્સ્ટેબલ રાકેશ ગાંભવાએ મૃતદેહ નો કબજો સંભાળી પોસ્ટમોર્ટમ કરાવ્યું છે.

પોલીસની પૂછપરછ દરમિયાન મૃતક પોતાના પત્ની અને પુત્ર સાથે વાંધો ચાલતો હોવાથી તે બંને અમદાવાદ રહેતા હતા અને પોતે જામનગરમાં એકલવાયું જીવન જીવતા હતા. તે જિંદગીથી તંગ આવી જઇ આ પગલું ભરી લીધું હોવાનુ પોલીસમાં જાહેર થયું છે.