દેવભૂમિ દ્વારકા જિલ્લામાં છેલ્લા ઘણા દિવસોથી વરસાદી બ્રેક બાદ ગઈકાલે જિલ્લાના જુદા જુદા વિસ્તારોમાં હળવા તથા ભારે વરસાદી ઝાપટા વરસ્યા હતા.

છેલ્લા કેટલાક દિવસોથી વધી ગયેલા બફારા અને ઉકળાટ બાદ ગઈકાલે ખંભાળિયા શહેરમાં વરસાદી માહોલ રહ્યો હતો અને દિવસ દરમિયાન હળવા છાંટા બાદ રાત્રીના આશરે સાડા દસ વાગ્યે વીજળીને ચમકારા વચ્ચે વરસાદનું એક જોરદાર ઝાપટું વરસી જતા શહેરના માર્ગો પાણીથી તરબતર બન્યા હતા. આજે સવારે પણ આ લખાય છે ત્યારે ઉકળાટ વચ્ચે વરસાદી માહોલ જોવા મળી રહ્યો છે.

ગઈકાલે સોમવારે સાંજે કલ્યાણપુર અને ભાણવડ તાલુકાના 20-20 મિલીમીટર વરસાદ નોંધાયો છે. જ્યારે દ્વારકામાં મોડી રાત્રે બે મિલીમીટર પાણી પડી ગયું હતું. આ વરસાદ ખેતરોમાં પાક માટે ફાયદા રૂપ ગણાય છે. અત્રે ઉલ્લેખનીય છે કે આ સિઝનમાં હાલ ખંભાળિયામાં સૌથી વધુ સવા 28 ઈંચ (708 મી.મી.) વરસાદ વરસી ચૂક્યો છે.