ઇન્ડોનેશિયાના પશ્ચિમ જાવા પ્રાંતના સિરેબોન જિલ્લામાં ગુનુંગ કુડા નામની પથ્થરની ખાણ ધસી પડવાથી શુક્રવારે એક મોટી દુર્ઘટના સર્જાઈ હતી. આ દુ:ખદ અકસ્માતમાં અત્યાર સુધીમાં ૧૯ લોકોના મોત થયા છે, જ્યારે એક ડઝનથી વધુ લોકો હજુ પણ કાટમાળમાં ફસાયેલા હોવાનું જાણવા મળે છે. 

સ્થાનિક પોલીસ વડા સુમરનીએ માહિતી આપી હતી કે શનિવારે બપોર સુધીમાં કાટમાળમાંથી ૧૬ મૃતદેહો કાઢવામાં આવ્યા છે, જ્યારે એક ઘાયલનું હોસ્પિટલમાં મૃત્યુ થયું છે. રાહત અને બચાવ કામગીરી ચાલુ છે, પરંતુ ખરાબ હવામાન, અસ્થિર જમીન અને ખડકાળ ભૂપ્રદેશને કારણે બચાવ કામગીરીમાં ઘણી મુશ્કેલીઓનો સામનો કરવો પડી રહ્યો છે. ઘટના સમયે ખાણમાં કામ કરતા લોકો અચાનક પથ્થર પડવાથી કાટમાળ નીચે દટાઈ ગયા હતા.